ව්යවස්ථාදායක සභාව සීමාව ඉක්මවා ගිහින් - ඇමති නලින්ද
December 30, 2025 05:39 pm
විගණකාධිපතිවරයා පත් කිරීමේදී ව්යවස්ථාදායක සභාව පටු අරමුණු මත රැඳෙමින් තම සීමාව ඉක්මවා කටයුතු කර ඇති බව කැබිනට් ප්රකාශක, අමාත්ය නලින්ද ජයතිස්ස මහතා පවසයි.
දැනට මාස කිහිපයක සිට විගණකාධිපති ධුරය හිස්ව පැවතීම සම්බන්ධයෙන් රජයේ ප්රවෘත්ති දෙපාර්තමේන්තුවේ අද (30) පැවැති කැබිනට් තීරණ දැනුම්දීමේ ප්රවෘත්ති සාකච්ඡාවේදී මාධ්යවේදීන් යොමු කළ ප්රශ්නවලට පිළිතුරු දෙමින් ඒ මහතා මේ බව පැවසීය.
ව්යවස්ථාවේ පවතින ජනාධිපතිවරයාට හිමි බලතල අනුව ව්යවස්ථාවේ පවතින විගණකාධිපතිවරයෙකු පත් කිරීමේ සුදුසුකම් සහිත පුද්ගලයින් අවස්ථා 4කදී ජනාධිපතිවරයා විසින් ව්යවස්ථාදායක සභාවට යොමුකර ඇති බව අමාත්යවරයා සඳහන් කළේය.
"කාටවත් මේක අභියෝගයට ලක් කරන්න බැහැ. ජනාධිපතිවරයාට හිමි බලතල අනුව සුදුසුකම් ලැබිය හැකි අය තමයි ජනාධිපතිවරයා මේ නම් කරලා යවලා තියෙන්නේ. මේ සියලුදෙනාම චාටඩ් එකවුන්ටන්ලා. ජනාධිපතිවරයා අවස්ථා දෙකකදී ඉදිරිපත් කළා.. ස්ථීර විගණකාධිපතිවරයෙක් සඳහා නාමයෝජනා දෙකක්."
"මේ සියලුදෙනාම සුදුසුකම් සහිත ආණ්ඩුක්රම ව්යවස්ථාව විසින් ඉල්ලා සිටින නිර්ණායකවලට සුදුසු පුද්ගලයින්. ඒ වගේම තවත් නම් 2ක් ඉදිරිපත් කළා.. විගණන දෙපාර්තමේන්තුවේ දැනට ඉන්න ජ්යේෂ්ඨතම විගණන නිලධාරීන්."
"මෙලෙස නම් ඉදිරිපත කරලා තිබියදීත් ව්යවස්ථාදායක සභාව ඒ අනුව කටයුතු නොකරනවා නම් ඉන් පෙන්නුම් කරන්නේ මේ රාජ්ය යාන්ත්රණය හෝ රාජ්ය යාන්ත්රණ ක්රියාවලිය කඩාකප්පල් කරන්න හිතාමතාම ඔවුන් කටයුතු කරනවා කියන එක."
"ව්යවස්ථාදායක සභාවට අයිතියක් නැහැ..එවන නම් ව්යවස්ථාවේ ආකාරයට සුදුසු නම්, ඒ ඕනම කෙනෙක් විගණකාධිපති ධුරයට ගැලපෙනවා නම්, ඊට වඩා සුදුසු කෙනෙක් එළියේ ඉන්නවා යැයි පවසා ඒ නම් ප්රතික්ෂේප කරන්න."
"ජනාධිපතිවරයාට ව්යවස්ථානුකූලව පැවරී ඇති බලයක් තිබෙනවා. ඒ අනුව තමයි ජනාධිපතිවරයා මෙතෙක් වැඩ කළේ. ඒ අනුව ඉදිරියටත් වැඩකටයුතු කරයි. ව්යවස්ථාදායක සභාවට අපි කියන්නේ ඔබට ව්යවස්ථාවෙන් පැවරී ඇති බලතල අනුව කටයුතු කරන්න. රට ඉදිරියට ගෙනයෑම ගැන සිතා කටයුතු කරන්න. ඔබගේ පටු සීමාවන් ඇතුළේ කටයුතු කිරීම සුදුසු නැහැ."
